Óskemendi jańajyldyq bezendirýge 70 mln teńgeden astam qarajat jumsalmaq

ÓSKEMEN. KAZINFORM – Óskemen qalasynda jańa jylǵa arnalǵan merekelik bezendirý jumystaryna 71,5 mln teńge qarastyrylǵan.

Memlekettik satyp alý portalyna jarııalanǵan derekterge sáıkes, qalalyq turǵyn úı-kommýnaldyq sharýashylyǵy, jolaýshy kóligi jáne avtomobıl joldary bólimi merekelik bezendirý jumystaryn júrgizetin merdigerdi izdestirip jatyr. Jalpy bul maqsatta 71,5 mln teńge jumsalmaq. 

Bul qarajat Respýblıka alańyndaǵy basty shyrshany ornatý, bezendirý, mereke aıaqtalǵan soń qaıta jınap alý jumystaryna, ortalyq alańdaǵy sýburqaq aýmaǵyn bezendirýge, Komsomol araly men Komendantka ózeniniń boıyna ınteraktıvti shyrshalar ornatýǵa jumsalady. 

Qalada burynnan bar áshekeılerden bólek jańalary ornatylmaq. Smetaǵa «2026» degen jaryqtandyrylǵan eki kompozıtsııany jasaý da engizilgen. Olar Dostyq úıi men 19-yqshamaýdan aýmaǵyna ornatylady. 

Buǵan qosa, merdiger negizgi merekelik lokatsııalarda fotozonalar men jaryq ınstallıatsııalaryn ázirleýi tıis.

Eske salsaq, osyǵan deıin Muǵaljar aýdanynyń ortalyǵy Qandyaǵash qalasyndaǵy LED ekranda «Jańa jylyńyzben!» degen jazý shyǵyp, ony turǵyn vıdeoǵa túsirip alǵany habarlanǵan.