Óskemendi tútin basqanyna 12 kún: mektepter qashyqtan oqýǵa kóshe me

ÓSKEMEN. KAZINFORM – Óskemen qalasyn tútin tumshalap turǵanyna 12 kún ótse de, óńirdegi mektepter onlaın formatqa aýystyrylmaı otyr. 

Turǵyndar jel soqpaı, kóshelerdi tútin basyp tursa da,  sabaqtyń onlaın formatqa ne sebepti aýystyrylmaı otyrǵanyn túsinbeı álek. Máselen, qarasha aıynda qolaısyz meteorologııalyq jaǵdaı uzaqqa sozylǵanda balalar mektepke barmaǵan bolatyn. 

Osy máselege baılanysty «Óskemen tynysy» ekologııalyq bıýrosy jobalyq keńsesiniń jetekshisi Elena Berezınskaıa-Abılova túsinik berdi. 

— Bizde balalardy qashyqtan oqytýǵa kóshirýdiń naqty mehanızmi joq. Bul tájirıbe oblys ákiminiń tapsyrmasymen qarasha aıynda bir ret qana qoldanylǵan. Biraq turaqty tájirıbege aınalý úshin naqty algorıtm qajet. Osyndaı algorıtmdi máslıhat otyrysynda bekitýdi kózdep otyrmyz. Qazir kelissózder júrgizilip jatyr, - dedi ol.

Demek, qujat qabyldanǵanǵa deıin mektepter qolaısyz meteorologııalyq jaǵdaı kezderinde onlaın formatqa kóshe almaıdy.

Eske salsaq, buǵan deıin Óskemendi tútin tumshalap turǵanyna 10 kún bolǵany habarlanǵan.