Óskemendi tútin basyp turǵanyna erteń úshinshi kún

ÓSKEMEN. KAZINFORM — Óskemen qalasynda taǵy da birneshe kún boıy jel soqpaı tur.

Qalada 27 naýryzdan beri qolaısyz meteorologııalyq jaǵdaı qalyptasqan. Jel soqpaǵandyqtan, kóshelerdi tútin basyp tur. Erteń de jaǵdaıdyń ózgermeıtindigi belgili boldy.

— 28 naýryz saǵat 20.00-den bastap 29 naýryz saǵat 20.00-ge deıin Óskemende ekinshi dárejeli qolaısyz meteorologııalyq jaǵdaı saqtalady, — delingen «Qazgıdromet» RMK taratqan aqparatta.

Qolaısyz meteorologııalyq jaǵdaı kezinde turǵyndarǵa úıden kópke shyqpaı, terezelerdi ashpaı otyrýǵa keńes berildi. Tamaqty tuz qosylǵan sýmen jıi shaıǵan jón. 

Aıta keteıik, buǵan deıin jelsiz kúnder aqpan aıynda jarty aıǵa jýyq ýaqytqa sozylǵan bolatyn. Sol kezde monıtorıng júrgizilgende aýaǵa taraǵan birqatar lastaýshy zat mólsheri ruqsat etilgen shekten asyp ketkeni tirkelgen.

Eske salsaq, buǵan deıin Ekologııa mınıstrligi kıik atýdan bas tartpaqshy ekendigin jazǵanbyz.