Óskemendi ne sebepti qysta jıi tuman tumshalaıdy

ÓSKEMEN. KAZINFORM – Óskemen qalasyna ne sebepti qysta jıi tuman túsetinine qatysty ákimdik ókilderi jaýap berdi. 

Turǵyndar arasynda ne sebepti qala kóshelerin basatyn tuman negizinen qysta bolady degen suraq jıi qoıylady. ShQO ákimdiginiń málimetinshe, buǵan birneshe faktor áser etip otyr.

– Qys kezinde jylý kózderine túsetin júkteme artyp, kólikter kóp qyzdyrylyp, jer úılerde pesh jaǵylady. Sondaı-aq eki sý elektr stantsııasy Ertis pen Úlbi ózenderiniń qys mezgilinde qatpaýyna ákelip, sodan qalyń tuman paıda bolady. Osynyń barlyǵy qolaısyz meteorologııalyq jaǵdaılarmen ushtasyp, lastaýshy zattardyń aýa qabatynyń jerge jaqyn bóliginde jınalýyna ákeledi, - delingen aqparatta. 

Belgili bolǵandaı, jelsiz kúnderde kásiporyndar óndiristik júktemeni 20-40 paıyzǵa deıin tómendetedi. 

– Sonymen qatar kóktem, jaz jáne kúz mezgilderinde qaladaǵy zııandy shyǵaryndylar qolaıly aýa raıynyń áserinen tabıǵı túrde taralyp ketetinin atap ótken jón. Ekologtar men meteorologtar atmosferalyq aýanyń jaı-kúıine turaqty túrde monıtorıng júrgizip jatyr, - delingen habarlamada.

Eske salsaq, osyǵan deıin Óskemende qolaısyz meteorologııalyq jaǵdaı kezinde qashyqtan oqýǵa kóshý tártibi bekitilgeni habarlanǵan.