Óskemendi aınalyp ótetin jol salýǵa 50 mlrd teńge qajet
ASTANA. KAZINFORM – Shyǵys Qazaqstan oblysynda Reseı men Qytaı baǵytyndaǵy tranzıttik júk kólikterin Óskemen qalasyna kirgizbeı ótkizetin aınalma jol salý jobasy qarastyrylyp jatyr. Jobanyń aldyn ala quny 50 mlrd teńgege baǵalanyp otyr, dep habarlaıdy Kazinform.
Jańa jol salý qajettiligi shekaraaralyq júk tasymalynyń artýyna baılanysty týyndaǵan. Qazir Reseı men Qytaı arasynda qatynaıtyn aýyr júk kólikteri Óskemen arqyly ótýge májbúr.
Kún saıyn qala kóshelerimen ótetin júk kólikteri jol jabynynyń tozýyna, negizgi dańǵyldarda keptelistiń kóbeıýine jáne turǵyn aýdandardaǵy ekologııalyq jaǵdaıdyń nasharlaýyna áser etip otyr.
Josparlanǵan aınalma jol tranzıttik kólik aǵynyn qalanyń ortalyq bóliginen syrtqa baǵyttaýǵa múmkindik beredi.
– Jobany iske asyrý Reseı Federatsııasy men Qytaı Halyq Respýblıkasy baǵytynda qatynaıtyn tranzıttik júk kólikterin Óskemenniń kóshe-jol jelisin aınalyp ótýge múmkindik beredi. Bul qala ishindegi negizgi joldarǵa túsetin kólik júktemesin aıtarlyqtaı azaıtyp qana qoımaı, jol qozǵalysynyń qaýipsizdigine de tikeleı áser etedi, – dedi Shyǵys Qazaqstan oblysy jolaýshylar kóligi jáne avtomobıl joldary basqarmasynyń basshysy Áset Sultanov.
Jańa magıstral qaladaǵy jóndeýden ótken jol ótkelderi men kópirlerdi shamadan tys júktemeden qorǵaýǵa, sondaı-aq shekara mańyndaǵy keden beketteri arasyndaǵy júk tasymalyn jedeldetýge yqpal etpek.
Qazir joba egjeı-tegjeıli pysyqtalyp jatyr. Mamandar joldyń ońtaıly baǵytyn anyqtap, ekonomıkalyq esepteýler júrgizýi jáne qurylysty bastaý úshin qarjylandyrý kózderin belgileýi tıis.
Ázirge qurylys jumystarynyń bastalý merzimi naqtylanǵan joq.
Aıta keteıik, buǵan deıin Almaty – Óskemen avtojolynyń 21 shaqyrymdyq jańartylǵan bóliginde kólik qozǵalysy ashylǵan bolatyn. Joldyń negizi nyǵaıtylyp, úsh qabatty asfaltbeton jamylǵysy tóselgen.
