Óskemen júrgizýshilerine «Sergek» arqyly 130 mln teńge aıyppul salynǵan

ÓSKEMEN. QazAqparat – Óskemen qalasynda ótken jyly «Sergek» kameralarynyń arqasynda 130 mln teńgeden astam aıyppul óndirildi, dep habarlaıdy QazAqparat tilshisi.

ShQO polıtsııa departamenti «Sergek» apparattyq-baǵdarlamalyq kesheniniń Óskemendegi 2022 jylǵy jumysynyń qorytyndysymen bólisti.

«Bir jyldyń ishinde qala boıynsha 151 323 ákimshilik quqyq buzýshylyq avtomatty túrde tirkelgen. Onyń ishinde jol qozǵalysy erejelerin buzý faktileri – 135 986. Sonyń nátıjesinde 130 mln teńgeden astam aıyppul óndirildi», - dep habarlady departamenttiń baspasóz qyzmeti.

Sonymen qatar atalǵan keshen kameralarynyń arqasynda iz-túzsiz joǵalyp ketken 8 adam tabylǵan.

Vedomstvo dereginshe, 2023 jyly Shyǵys Qazaqstan oblysynyń taǵy eki qalasynda «Sergek» kameralary ornatylady. Ol – Rıdder men Altaı qalalary.