Óskemen joldaryndaǵy 600-den astam shuńqyr jamaldy

ÓSKEMEN. QazAqparat – Óskemen qalasynda «100 kúnde 10 000 shuńqyr» aktsııasy aıasynda halyq 600-den astam shuńqyrdy jamatty, dep habarlaıdy QazAqparat tilshisi.

Qala ákimdiginiń málimetine súıensek, Óskemende bıyl alǵash ret «100 kúnde 10 000 shuńqyr» aktsııasy iske qosylǵan. «Keptelissiz qala» baǵdarlamasy aıasyndaǵy aktsııada turǵyndar joldardaǵy shuńqyrlardy fotoǵa túsirip, ákimdiktiń arnaıy telegramm arnasyna jiberedi, al merdigerler sol joldardy qalypqa keltiredi.

«Turǵyndar naýryz aıynyń aıaǵynan bastap qolǵa alynǵan aktsııaǵa belsendi qatysyp jatyr. Osy ýaqytqa deıin 600 shuńqyr jamaldy. Jóndeý jumystaryn júrgizetin birneshe merdiger bar. Azamattardy taǵy da belsendilik tanytýǵa shaqyramyz», - deıdi qala ákimi Jaqsylyq Omar.

Aıta ketý kerek, bul aktsııa shuńqyrlarǵa ǵana qatysty bolǵandyqtan, aýla aralyq joldardy jóndeýge ótinishter qabyldanbaıdy.

Eske salsaq, osyǵan deıin Óskemende «100 kúnde 10 000 shuńqyr» aktsııasy iske qosylǵanyn habarlaǵan edik.