Óskemen joldaryndaǵy beınebaqylaý kameralary qaıta iske qosyldy
ÓSKEMEN. KAZINFORM – Óskemen qalasynda biraz ýaqyttan beri jumys istemeı turǵan beınebaqylaý kameralary qaıta iske qosyldy.
Qala boıynsha 2018 jyly «Sergek» kameralaryn ornatqan «Kórkem Telekom» JShS-men oblys ákimdigi arasyndaǵy kelisimshart osy jyldyń shilde aıynda toqtady. Sebebi tenderdi «Satory Company LTD» kompanııasy utyp alǵan. Sol ýaqyttan beri beınebaqylaý kameralary arqyly aıyppul salý toqtatyldy.
Búgin Shyǵys Qazaqstan oblysynyń Jolaýshylar kóligi jáne avtomobıl joldary basqarmasy «Beınebaqylaý júıesin jańǵyrtý jáne keńeıtý» jobasyn iske asyratyn «Satory Company Ltd» JShS kompanııasymen birlesip, Óskemen qalasynda beınebaqylaý jabdyqtarynyń qosylǵanyn jáne quqyq buzýshylyqtardyń tirkeletindigi týraly habarlady.
«Joba aıasynda buryn ornatylǵan jabdyqtar, jańa beınebaqylaý kameralary men jol erejesi buzýshylyqtaryn tirkeıtin apparattyq-baǵdarlamalyq keshender iske qosyldy. Osyǵan baılanysty qala turǵyndaryna ákimshilik jaýapkershilikke tartylmaý úshin jol qozǵalysy men qoǵamdyq tártip erejelerin saqtaýdy suraımyz», - dep habarlady basqarmadan.
