Óskemen joldaryn polıtseıler qyzmettik emes kólikpen jasyryn kamera arqyly patrýldep jatyr

ÓSKEMEN. KAZINFORM – Óskemen qalasynda tártip saqshylary joldardy qyzmettik emes kólikpen jasyryn kamera arqyly patrýldeı bastady.

Óskemende polıtseıler synaq rejıminde kóshe patrýldeýdiń jańa ádisine kóship kórdi. Sonyń aıasynda olar jumysqa qyzmettik emes kólikpen shyqty. Kóliktiń aldyńǵy oryndyǵyna robotqa uqsaıtyn, jol qozǵalysy erejelerin buzý faktilerin tirkeıtin avtomatty júıe ornatylǵan. Jasyryn patrýldeý arqyly jol-kólik oqıǵalarynyń sany azaıady dep josparlanyp otyr.

- Jasyryn patrýldeýdiń basty maqsaty – júrgizýshilerdiń jol erejelerin saqtaý kórsetkishin jaqsartý. Qazirgi ýaqytta jyldamdyqty arttyrǵandardy tirkeıtin bir kólik jolda júr. Dese de ereje buzǵandar tek synaq rejıminde tirkeldi. Júrgizýshiler áli jaýapkershilikke tartylǵan joq, - dep habarlady ShQO Polıtsııa departamentinen.

Vedomstvo dereginshe, qala joldaryn kúndelikti jasyryn patrýldeý qashan bastalatyny áli naqtylanbaǵan.

Eske salsaq, buǵan deıin Abaı oblysynda tórt kúnde mas kúıde kólik aıdaǵan 11 adam ustalǵany habarlanǵan.