Óskemen JEO-da jańa energobloktyń qurylysy bastaldy
ASTANA. KAZINFORM — Óskemen JEO-da jańa energobloktyń qurylysy bastaldy. Joba qalanyń jylý tapshylyǵyn azaıtyp, shamamen 300 turǵyn úı men áleýmettik nysandy jylýmen qamtýǵa múmkindik beredi.
QR Energetıka mınıstrliginiń habarlaýynsha, qurylys jumystarynyń bastalýyna arnalǵan is-shara barysynda ýaqyt kapsýlasy salyndy.
Óskemen JEO qalanyń ortalyqtandyrylǵan jylýmen qamtamasyz etý qajettiliginiń shamamen 85%-yn óteıdi. Joba aıaqtalǵannan keıin stantsııanyń jylý qýaty 130 Gkal/saǵ, al elektr qýaty 100 MVt-qa artady. Qurylys jumystaryn 2030 jylǵa deıin aıaqtaý josparlanyp otyr.
Vedomstvonyń málimetinshe, jańa qýattar jylý energııasynyń qazirgi tapshylyǵyn azaıtyp, qalanyń odan ári damýy úshin qajetti rezervti qalyptastyrýǵa múmkindik beredi. Jobany daıyndaýdyń negizgi kezeńderiniń biri Qazaqstan Respýblıkasynyń Energetıka mınıstrligi men Óskemen JEO arasynda ınvestıtsııalyq kelisim jasasý boldy.
— Jańa energoblok qala turǵyndaryn jylý jáne elektr energııasymen qamtamasyz etedi. Bul Óskemenniń odan ári damýy úshin qajetti qýat rezervin qalyptastyrýǵa múmkindik beredi. Sonymen qatar joba jańa jumys oryndaryn qurady. Mamandar zamanaýı jabdyqtarmen jumys istep, kásibı daǵdylaryn únemi jetildire alady. Energetıka salasyna jańa qýattarmen qatar, sol nysandarda jumys isteıtin bilikti mamandar qajet, — dedi QR Energetıka mınıstri Erlan Aqkenjenov.
Jańa energoblokty salý kezinde zamanaýı tehnologııalyq sheshimder men shyǵaryndylardy tazartý júıelerin qoldaný kózdelgen. Bul jylý jáne elektr energııasyn óndirý tıimdiligin arttyryp, qorshaǵan ortaǵa áserdi azaıtýǵa múmkindik beredi.
Jobany «Qazaqstan kommýnaldyq júıeleri» kompanııalar tobynyń quramyna kiretin «Óskemen JEO» JShS Eýrazııalyq damý banki men Halyk Bank-tiń qatysýymen júzege asyrady. Jobany iske asyrý nátıjesinde shamamen 300 turǵyn úı men áleýmettik nysandy jylýmen qamtamasyz etý josparlanýda. Sonymen qatar joba aıasynda shamamen 50 jańa jumys orny ashylady.
Eske salaıyq, buǵan deıin Almatydaǵy JEO-3 qurylysy kesteden edáýir keshigip jatqanyn habarlaǵanbyz.
