Óskemen jaǵajaılary jańa maýsymǵa daıyn emes - TJ qyzmeti
ÓSKEMEN. QazAqparat - Óskemen jaǵajaılaryn sońǵy tekserý barysynda resmı úsh demalys oryndarynyń biri de júz paıyzǵa qaýipsiz emes ekendigin kórsetti, dep habarlady qalalyq TJ basqarmasynan.
1 maýsymda bastalǵan shomylý maýsymynyń ashylýyna deıin jaǵajaılardyń shomylý maýsymyna daıyndyǵy tekserildi, jáne olardyń barlyǵy qanaǵattanarlyqsyz jaǵdaıda ekeni anyqtaldy. Odan keıin demalys oryndarynyń ıelerine buzýshylyqtardy joıyp, tıisti tártipke keltirý úshin ýaqyt berildi.
Ókinishke qaraı, sońǵy tekserýler qutqarýshylar beketteriniń áli kúnge deıin qutqarý jabdyqtarymen sońyna deıin jaraqtandyrylmaǵanyn, balalar úshin tereńdigi 1,2 metrden aspaıtyn shomylý oryndary joq ekendigin, daýysy qatty shyǵatyn qurylǵylar men telefondardyń, alǵashqy medıtsınalyq kómek kórsetý bólmeleriniń joqtyǵyn, kórneki nasıhat stendteri tolyq kólemde daıyndalmaǵanyn kórsetti.
Budan basqa, TJ qyzmetinen atap ótkendeı, jaǵajaıda kem degende eki qutqarýshy men bir medıtsınalyq qyzmetker bolýy tıis. Bul oryndarǵa tıisti daıyndyqtan, attestattaýdan ótken maýsymdyq qyzmetkerler tartylyp otyr. Biraq joǵaryda atalǵan mamandardyń oqytylýyn jaǵajaılar qojaıyndary qamtamasyz etken joq.
Sońǵy qorytyndylar boıynsha aqparat qala ákimi men prokýratýraǵa jiberiledi.
Osy arada, aımaq qutqarýshylarynyń málimetteri boıynsha, shomylý maýsymy bastalǵannan beri oblys ortalyǵyndaǵy birneshe adam sýǵa ketken.
