Óskemen týrnırinde qazaqstandyq tennısshiler ózara kezdesedi
NUR-SULTAN. QazAqparat – Óskemen qalasynda áıelder arasynda ITF World Tennis Tour W25 týrnıri jalǵasýda, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, qazaqstandyq Gózal Aınıtdınova alǵashqy aınalymda Izraıl ókili Koen Sapırmen sheberlik baıqasty.
Qazaqstandyq sportshy qarsylasyn 6:2, 6:1 esebimen ońaı jeńdi.
G.Aınıtdınova shırek fınalǵa shyǵý úshin otandasy, osy jarystyń 6-raketkasy Jibek Qulambaevamen talasady.
Óskemen tennısiniń jas juldyzdary Tatıana Nıkolenko men 14 jastaǵy Málıka Ámirǵalıeva ekinshi aınalymǵa shyǵa almady. T.Nıkolenko reseılik Ekaterına Maklakovaǵa esh qarsylyq kórsete almady – 0:6, 0:6.
Málıkanyń álemdik reıtıngte 1473-orynda turǵan 21 jastaǵy reseılik Arına Solomatınamen matchy tartysty órbidi. Úsh saǵatqa jýyq ýaqytqa sozylǵan básekede reseılik sportshy 3:6, 6:2, 6:3 esebimen jeńiske jetti. Degenmen M.Ámirǵalıeva dodada qalady, ol erteń shırek fınalda juptyq kezdesýin ótkizedi.
Eske sala keteıik, budan buryn Mıhaıl Kýkýshkınniń Chıkago týrnıriniń ekinshi aınalymyna ótkenin jazǵan bolatynbyz.
