Óskemen túrmesinde jazasyn óteýshi jasyrylǵan qarý-jaraq týraly aıtty

ÓSKEMEN. QazAqparat – Óskemen qalasyndaǵy túrmede otyrǵan jazasyn óteýshi quqyq qorǵaý organy qyzmetkerlerine qarý-jaraq tyǵylǵan oryn týraly aqparat berdi, dep habarlaıdy QazAqparat tilshisi.

ShQO boıynsha qylmystyq atqarý júıesi departamenti baspasóz qyzmetiniń málimetine súıensek, Óskemendegi №17 túzetý mekemesinde jazasyn óteýshi túrme qyzmetkerlerine basqa sottalǵan adamnyń zańsyz saqtalǵan qarý-jaraqty qaıda tyǵyp qoıǵanyn aıtyp berdi.

Osyǵan oraı, QAJ jáne polıtsııa departamentteri birlesip, jedel-izdestirý sharalaryn júrgizdi. Nátıjesinde, qarý-jaraq pen oq-dáriler saqtalǵan jer tabyldy.

Kúdikti qarýdy byltyr jazda qala shetindegi «Babkına Melnıtsa» shaǵyn aýdanynda qaraýsyz qalǵan úıdiń jertólesine tyqqan. Tegis uńǵymaly myltyq pen ártúrli kalıbrli 10-nan astam patron tárkilendi.

«Qazirgi ýaqytta sot-ballıstıkalyq saraptama taǵaıyndaldy. Atalǵan fakti boıynsha Qazaqstan Respýblıkasy Qylmystyq Kodeksiniń 287-baby 3-bóligimen (Qarýdy, oq-dárilerdi, jarylǵysh zattardy jáne jarylǵysh qurylǵylardy zańsyz alý, berý, ótkizý, saqtaý, tasymaldaý nemese alyp júrý) tergeý amaldary júrgizilip jatyr», - delingen aqparatta.