Óskemen turǵynynyń 6 mln teńgesin alǵan alaıaq ustaldy
ShQO Polıtsııa departamenti baspasóz qyzmetiniń málimetine súıensek, qalalyq PB Úlbi polıtsııa bólimine 53 jastaǵy turǵyn júgindi. Óz sózinde ol alaıaqqa aldanyp, 5 900 000 teńgesinen aıyrylǵanyn jetkizgen.
Belgili bolǵandaı, jábirlenýshige ózin rıeltor retinde tanystyrǵan beıtanys bireý qujattar kórsetip, senimine kirgen. Baspana satyp alýǵa kómektesetindigin aıtyp, ýáde berdi. Alaıda kelisim-shartqa qol qoıyp, qomaqty qarjy qolyna túsisimen ol múlde baılanysqa shyqpaı ketken.
«Jedel-izdestirý sharalarynyń nátıjesinde tártip saqshylary 32 jastaǵy kúdiktini ustady. Oǵan qatysty kelý týraly mindetteme túrinde bultartpaý sharasy tańdaldy. Atalǵan fakti boıynsha QR QK-niń 190-baby 3-bóligine (Alaıaqtyq) sáıkes sotqa deıingi tergeý amaldary bastalǵan», - delingen aqparatta.
Esterińizge sala ketsek, osyǵan deıin ShQO ákimdiginiń qasyndaǵy ǵımaratqa bomba qoıylǵany týraly jalǵan aqparat túskenin habarlaǵan edik.
