Óskemen turǵynynan aqsha bopsalaǵandar ustaldy
ÓSKEMEN. QazAqparat - Óskemen qalasy turǵynynyń kóligin tartyp alyp, aqsha bopsalaǵandar ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary shahar turǵynynan iri kólemde aqsha talap etip, bopsalaýmen aınalysqan qylmystyq top múshelerin qolǵa túsirdi.
«20-25 jas aralyǵyndaǵy bir top adam jábirlenýshiniń avtokóligin tartyp alyp, ony qaıtarý úshin qomaqty qarajat suraǵan. Atalǵan fakti boıynsha jyldam áreket etken polıtsııa qyzmetkerleri kúdiktilerdi aqsha alý barysynda ustady. Olardan jábirlenýshiniń travmatıkalyq qarýy men avtokóligi tárkilendi», - dedi ShQO PD bastyǵy Saǵat Mádıev.
Ustalǵan er adamdar saqshylarǵa baǵynbaı, úılerdiń aýlalarynda jasyrynýǵa tyrysqan. Olardyń biri tapanshamen qarýlanǵan eken. Kúdiktilerge qatysty QR QK-niń 194-baby boıynsha sotqa deıingi tergeý amaldary júrgizilýde.
