Óskemen turǵynyna úı alýǵa kómektesetindigin aıtqan alaıaq 11 mln teńge paıda kórgen
ShQO polıtsııa departamenti baspasóz qyzmetiniń málimetine súıensek, 102 jedel arnasyna 35 jastaǵy qala turǵyny habarlasqan. Er adam turǵyn úı satyp alamyn dep alaıaqtyń qurbany bolǵanyn jetkizdi.
«Belgili bolǵandaı, jábirlenýshini áńgimege tartqan tanysy 50/50 degen baǵdarlama boıynsha páter satyp alýǵa kómektese alatyndyǵyn aıtqan. Buǵan sengen azamat oǵan 11 650 000 teńge bergen. Alaıda aılasyn asyrǵan alaıaq úıdi de alyp bermegen, aqshasyn da qaıtarmaǵan», - delingen aqparatta.
Tártip saqshylary qysqa ýaqyt ishinde kúdiktini ustady. Jaýap alý kezinde bankte jumys isteıtin 37 jastaǵy er adam óz kinásin moıyndaǵan.
Atalǵan fakti boıynsha QR QK-niń 190-baby 3-bóligine (Alaıaqtyq) sáıkes sotqa deıingi tergeý amaldary bastaldy. Eger kúdiktiniń kinási dáleldense, onda ol úsh jyldan jeti jylǵa deıingi merzimge bas bostandyǵynan aıyrylýy múmkin.
