Óskemen turǵyny jasandy aqshaǵa noýtbýk satyp alǵan
ÓSKEMEN. QazAqparat - Óskemende er adam kompıýter tehnıkalaryn satatyn dúkennen 115 myń teńgege noýtbýk alǵan. Satýshy qabyldap alǵan aqshasynyń ánsheıin jasandy qaǵazdar (sývenır) ekenine kóz jetkizip úlgergenshe, er adam taıyp turǵan, dep habarlaıdy «QazAqparat» HAA tilshisi ShQO ІІD baspasóz qyzmetine silteme jasap.
Zardap shegýshi birden polıtsııaǵa habarlasqan. Polıtsııa syrt belgilerine qarap, kúdiktini ustady. Ol oblys ortalyǵynyń buryn birneshe ret sottalǵan 26 jastaǵy turǵyny bolyp shyqty.
Noýtbýk dúkenge qaıtaryldy. Onyń áreketteri alaıaqtyq dep tanyldy. QR Qylmystyq kodeksiniń 190-baby boıynsha sotqa deıingi tergep-tekserý júrip jatyr.
