Óskemen turǵyny sýǵa batqan 14 jasar qyzdy qutqaryp qaldy
ÓSKEMEN. QazAqparat – Óskemen qalasynyń turǵyny sýǵa batyp bara jatqan 14 jasar qyzdy qutqaryp qaldy , dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, Vıktor Zemlıanýhın týystarymen birge «Ermak» baý-baqsha qaýymdastyǵy mańynda ornalasqan sý qoımasyna demalý úshin kelgen.
Kómek surap aıqaılaǵan daýysty estigen jigit dereý sý jaǵasyna qaraı júgirdi.
Jaǵada birneshe adam júze almaǵandyqtan ne isterin bilmeı abdyrap tur eken. Olar Vıktorǵa 14 jasar qyzdyń sýǵa batyp bara jatqanyn jetkizedi.
«Jyldam áreket etý kerek boldy. Oılanbastan sýǵa súńgidim. Alaıda sý túbi laı bolǵandyqtan túk kóre almadym. Sodan keıin aýa jutyp alyp ekinshi ret súńgigen kezde qyzdy kórip qaldym da, ony jaǵaǵa súıreı bastadym. Sýdan shyǵarǵan soń jasandy tynys aldyryp, júrekke massaj jasadym. Anam Ella Zemlıanýhına meni almastyryp, jedel járdem kelgenshe kezek-kezek kómek kórsettik», - deıdi beıbit kúnniń batyry.
Osylaısha, qyz aman qaldy. Onyń ómirine eshqandaı qaýip tónip joq.
