Óskemen turǵyny nesıelik seriktestik arqyly 30 mln teńgeni jymqyrǵan
ÓSKEMEN. QazAqparat - Óskemen qalasynda «Ertis» áleýmettik-kásipkerlik korporatsııasyna qatysty taǵy bir is sotqa jetti. Qala turǵyny nesıelik seriktestik qurý arqyly memlekettik baǵdarlamanyń aqshasyn qaltaǵa basqan, dep habarlaıdy QazAqparat tilshisi.
Sottalýshy «Ertis» áleýmettik-kásipkerlik korporatsııasy nesıelik seriktestikter arqyly bıznes-jobalarǵa nesıe beretinin estip, jymysqy jospar qurady. Áýeli jumyssyz júrgen tórt tanysyn ózi qurǵan nesıelik seriktestikke kirgizip, árqaısysyna 3 mln teńge nesıe alyp berýge ýáde etedi. Ádilet organyna «Óskemen Kredıt Konsulting» NS» JShS-in sátti tirketken soń, «Ertis» ÁKK arqyly 14,988 mln teńge nesıe alady. Barlyq qujat qolynda bolǵanyn paıdalanyp, seriktestiktiń árbir múshesine mal satyp alý úshin 3 mln teńgeden aqsha usynǵany týraly jalǵan kelisimshart toltyrǵan. Osydan keıin barlyq aqshany qaıtadan óz shotyna aýdaryp, ««Qazkommertsbank» AQ fılıaly arqyly sheship alǵan. Al «Ertis» ÁKK-ge nesıeniń barlyǵyna mal satyp alynǵany týraly jalǵan qujat ótkizedi. Qunyqqan jigit onymen qoımaı, taǵy 5 adamdy ózi qurǵan seriktestikke aldap kirgizedi de, olardyń atyna 15 mln teńgeniń nesıesin rásimdeıdi. Bul aqsha da úırenshikti tásilmen nesıelik seriktestik dırektorynyń qaltasyna túsken. Osylaısha seriktestik basshysy ózgelerdiń senimine kirý arqyly jalpy somasy 29,988 mln teńgeni ıemdengen.
Oǵan alaıaqtyq jáne ózgeniń múlkin urlaý baptary boıynsha aıyp taǵylyp, bes jylǵa bostandyǵynan aıyryldy.
Al «Ertis» ÁKK-niń 29,988 mln teńge óndirip berý týraly ótinishi ishinara qanaǵattandyryldy. Aıypty azamat 390 myń teńgeni óz erkimen qaıtarǵanyn eskergen sot ony qalǵan 29,598 mln teńgeni qaıtarýǵa mindettep otyr. Sonymen qatar, sot protsesteriniń shyǵyny retinde 417295 teńge tóleýi tıis. Bultartpaý sharalary kezinde aıyptalýshynyń tanysy kepil retinde «KAMAZ 5410» júk kóligin qoıǵan. Bostandyqqa shyǵysymen ol sot shaqyrýynan boı tasalap, qaıtadan qamaýǵa alynypty. Osy sebepti kepilge qoıylǵan kólik memleket menshiginde qaldy.
