Óskemen turǵyny burynǵy áıelin boqtaǵany úshin kóshede qar kúrep júr

ÓSKEMEN. QazAqparat – Óskemen qalasynyń turǵyny burynǵy áıelin boqtaǵany úshin qoǵamdyq jumysqa jegildi, dep habarlaıdy QazAqparat tilshisi.

ShQO boıynsha QAJ departamenti baspasóz qyzmetiniń málimetine súıensek, 42 jastaǵy er adam beınebaılanys arqyly burynǵy áıeline qońyraý shalǵan.

Sóılesý barysynda ony qorlap, balaǵat sózder aıtqan. Áıel adam polıtsııaǵa aryz túsirgen soń is sotqa jetti.

Óskemen qalalyq №2 soty er adamdy QR Qylmystyq kodeksiniń 131-baby 1-bóligine (qorlaý) sáıkes kináli dep tanydy.

Sottalýshy jábirlenýshige 100 myń teńge mólsherinde moraldyq zalal tólep, qoǵamdyq jumysqa jegildi.

«Sot sheshimimen aıyptalýshy qala aýmaǵynda 40 saǵattyq qoǵamdyq jumysqa tartylyp, kósheni qardan tazalaıdy. Qazirgi ýaqytta ol Óskemendegi negizgi kóshelerde jumys istep júr», - deıdi Óskemen qalalyq probatsııa qyzmeti bastyǵynyń orynbasary Symbat Botaev.