Óskemen turǵyny áıelin úıde ózi bosandyryp aldy

ÓSKEMEN. QazAqparat – Óskemen qalasynda er adam áıelin úıde ózi bosandyryp aldy, dep habarlaıdy QazAqparat tilshisi.

ShQO densaýlyq saqtaý basqarmasy baspasóz qyzmetiniń málimetine súıensek, oqıǵa 11 jeltoqsan kúni bolǵan.

Júktiliktiń 37 aptasyndaǵy áıel kenet tolǵata bastaıdy. Sol kezde kúıeýi birden jedel járdem shaqyrtqan.

Alaıda medıtsına qyzmetkerleri kelip jetkenshe dıspetcher er adamǵa telefon tutqasyn qoıǵyzbaı, ne isteý kerektigin túsindirip otyrdy.

«Dıspetcher oǵan áıelin bosandyrý úshin kezeń-kezeńimen nusqaýlyqtar berdi. Telefondy dybys kúsheıtkishke qoıǵan azamat ár aıtqan áreketti qaıtalap otyrdy. Kóp uzamaı áıel aman-esen bosanyp, shaqalaqtyń jylaǵan úni estildi», - delingen aqparatta.

Sodan soń dıspetcher balany anasynyń keýdesine qoıýǵa keńes bergen.

Sálden keıin jedel járdem qyzmetkerleri de kelip jetti.