Óskemen turǵyny 30 jyl qujatsyz ómir súrgen

ÓSKEMEN. QazAqparat - Óskemen turǵyny 30 jylǵa jýyq jeke basyn kýálandyratyn qujatsyz ómir súrip kelgen. Bul týraly QazAqparat Shyǵys Qazaqstan oblysynyń Polıtsııa departamentine silteme jasap habarlaıdy.

«Shyǵys Qazaqstan oblysynyń Polıtsııa departamentiniń kóshi-qon qyzmetine oblys ortalyǵynyń 46 jastaǵy turǵyny Marat Tulybaev júgindi. Onyń qolynda 1989 jyly berilgen eski úlgidegi tólqujat qana bolǵan. Sodan beri jeke basyna eshqandaı qujat rásimdemegen. Óziniń aıtýyna qaraǵanda, qujat rásimdeýge áýelde qarajaty bolmaǵan. Keıin zań aldyndaǵy jaýaptylyqtan qorqyp, eshbir organǵa júginbegen. Ol buǵan deıin qujatqa degen asa bir qajettilik bolmaǵanyn aıtady», - deıdi departamenttiń baspasóz qyzmetshisi Azamat Raısov.

Polıtsııa qyzmetkerleri óskemendik turǵynǵa eki aptanyń ishinde qajetti qujattardy jınaýǵa kómektesken.

«Áýeli týý týraly kýáliktiń túpnusqasyn, orta mektep bitirgeni týraly anyqtamany kóterttik. Ótinish ıesi KSRO ydyraǵannan keıin eshbir eldiń azamattyǵyn almaǵan eken. Barlyq qajetti qujattardy jınaǵannan keıin kóshi-qon basqarmasy oǵan Qazaqstan Respýblıkasynyń azamaty ekenin rastaıtyn anyqtama tabys etti. Atalǵan anyqtamamen azamat kez kelgen Halyqqa qyzmet kórsetý ortalyǵynan jeke kýáligin ala alady. Bul rette, oǵan qandaı da bir aıyppul sanktsııalary qoldanylǵan joq.Tek jeke kýálikti resimdeý úshin 500 teńge kóleminde memlekettik baj salyǵyn tóleýi tıis», - deıdi Azamat Raısov.