Óskemen turǵyndarynan 30-dan astam ruqsattama tárkilendi
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri karantın kezindegi tártipti saqtaý maqsatynda reıd júrgizdi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Óskemen qalasynyń 36 turǵyny shekteý sharalaryn buzyp, jeke kólikterimen Altaı aýdanyndaǵy Buqtyrma aýylyna jolǵa shyǵyp ketken.
«Tártip saqshylary zańbuzýshylyqqa jol bergenderden ruqsat qaǵazdaryn tárkilep aldy. Olarǵa qatysty ákimshilik hattama toltyryldy. Qala turǵyndaryna karantın kezindegi shekteý sharalaryn qatań saqtaý qajettigin eskertemiz», - dep habarlady vedomstvo ókilderi.
Aıta keteıik, karantın ýaqytynda qala syrtyna shyǵýǵa tyıym salynǵan. Demalys jáne mereke kúnderi jeke kólikpen júrýge bolmaıdy.
