Óskemen turǵyndary meshitke baryp vaktsına ala alady
ÓSKEMEN. QazAqparat – Óskemen qalasyndaǵy «Halıfa Altaı» meshitinde vaktsınatsııa pýnkti ashyldy, dep habarlaıdy QazAqparat tilshisi.
16 sáýirde oblystyq «Halıfa Altaı» meshitinde tolyqtaı jabdyqtalǵan mamandandyrylǵan vaktsınatsııa pýnkti jumysyn bastady. Vaktsına alǵan patsıent keń kútý zalynda 30 mınýt medıtsınalyq baqylaýda bolady.
«Birinshiden, bul turǵyndarǵa yńǵaıly bolý úshin jasalǵan. Ekinshiden, vaktsınatsııalaý protsesin jedeldetýdiń amaly. Alǵashqy kúni-aq vaktsına alýǵa nıet bildirýshiler tabyldy. Barlyq protsedýraǵa shamamen jarty saǵat ýaqyt ketedi. Vaktsınatsııalaý aldynda dene temperatýrasy ólshenip, dárigerdiń mindetti tekserýi júrgiziledi», - delingen ShQO Sanıtarlyq-epıdemıologııalyq baqylaý departamenti taratqan habarlamada. 
Turǵyndardan tek jeke kýálik pen vaktsına alýǵa bolatyndyǵy jaıly dárigerdiń ruqsaty qajet. Patsıentke ekinshi dozanyń salynatyn ýaqyty men vaktsınanyń qandaı janama áserleri bolatyndyǵy týraly jadynama beriledi.
«Erte me, kesh pe báribir vaktsına alý kerek dep oılaımyn. Vaktsınatsııa ujymdyq ımmýnıtetti qalyptastyrady jáne búgingi ýshyǵyp turǵan epıdemıologııalyq ahýaldy jaqsartady. Keıbireýler aýrýhanaǵa barǵysy kelmeıdi. Al meshittegi pýnktte barlyǵy talapqa saı uıymdastyrylǵan ári óte yńǵaıly. Sondaı-aq Ana men bala ortalyǵynan jabdyqtar ákelindi. Vaktsınatsııa pýnkti sanıtarlyq erejelerge sáıkes keledi», - dedi ShQO Bas memlekettik sanıtarlyq dárigeri Qanat Turdıev.
