Óskemen turǵyndary qalany abattandyrý boıynsha ákimdikke usynys jasaı alady
ÓSKEMEN. QazAqparat – Óskemen turǵyndary qala aýmaǵyn abattandyrýǵa qatysty óz usynystaryn jasaı alady, dep habarlaıdy QazAqparat tilshisi.
Qala ákimdiginiń málimetine súıensek, Halyq qatysatyn bıýdjet jobasy aıasynda ótinim qabyldaý bastaldy.
«Bul joba azamattarǵa shahardy damytýǵa qatysty óz usynystaryn jasaýǵa múmkindik beredi. Ótinimdi kez-kelgen turǵyn qaldyra alady. Olar qala aýmaǵyn abattandyrýǵa qatysty bolýy múmkin. Mysaly, skver, balalarǵa arnalǵan alańdar, demalys aımaǵyn, jaıaý júrginshiler ınfraqurylymyn jasaý, kóshe jaryǵyn ornatý. Jobalar jınaqtalǵan soń onlaın túrde daýys berý júrgiziledi. Sonyń barysynda 2023 jylǵa arnalǵan basym jumystardyń tizimin birge anyqtaımyz», - dedi Óskemen qalasynyń ákimi Jaqsylyq Omar.
Aıta keteıik, ótinimder ákimdik saıtynda 10 naýryzǵa deıin qabyldanady. Daýys berý 27 naýryzda ótedi dep josparlanýda.
