Óskemen turǵyndary bir jylda kóligine sándi nómir alý úshin 66 mln teńge jumsaǵan
Óńirlik kommýnıkatsııalar qyzmetinde «Azamattarǵa arnalǵan úkimet» memlekettik korporatsııasynyń ShQO boıynsha fılıalynyń dırektory Azamat Esembýlov baspasóz máslıhatyn ótkizdi.
«Ótken jyly Shyǵys Qazaqstanda HQO-lar arqyly 866 myńnan astam memlekettik qyzmet kórsetildi. Oblys turǵyndary elektrondyq qyzmetterdi jıi paıdalana bastaǵany baıqalady. Halyq arasynda eń tanymal qyzmetter týraly aıtar bolsaq, ETsQ alýǵa – 288 301 adam júginse, kólik quraldaryn tirkeýge – 166 390 adam ótinish bildirgen. Úshinshi orynda – pasporttar jáne jeke kýálikter berý (101 471 adam), tórtinshi orynda – jyljymaıtyn múlikke quqyqtardy tirkeý (83 415 adam), besinshi orynda – júrgizýshi kýálikterin berý (63 758 adam)», - deıdi ol.
Sonymen qatar oblys turǵyndary kólikterine VIP nómirlerdi jıi satyp ala bastaǵan. Máselen, Óskemende 2020 jyly – 175 sándi nómir, 2021 jyly – 411, ótken jyly – 443 satyp alyndy. Sońǵy jylda qala halqy bul maqsatqa 66 mln 254 myń teńge jumsaǵan.
«VIP nómirlerdiń quny sandar men áripterge baılanysty jáne 196 650 teńgeden 983 250 teńgege deıin ózgeredi. Memlekettik nómirdiń ıesi ony basqa adamǵa berýge nemese satýǵa quqyǵy joq. Avtokólik satylǵan jaǵdaıda, ıesi ony jańa kólik satyp alǵanǵa deıin 6 aıǵa deıin arnaıy baǵamen saqtaı alady», - dep túsindirdi Azamat Esembýlov.