Óskemen turǵynyn aldaǵan alaıaq 115 mln teńge paıda kórgen
ÓSKEMEN. KAZINFORM — Óskemen qalasynyń turǵynyn aldap soqqan alaıaq 115 mln teńge paıda kórgen.
Polıtsııa qyzmetkerlerine habarlasqan azamat alaıaqtyń qurbany bolǵanyn aıtqan.
Óz sózinde ol osydan 4 jyl buryn tanysynyń «kásipkerlik úshin qajet» dep ózinen iri mólsherde qarajat alǵanyn jetkizdi.
«Er adam jábirlenýshige ártúrli bıznes túrlerimen aınalysqysy keletinin, ıaǵnı, qaıta satý úshin avtomobılder, metall óndirý úshin ekskavator satyp alatynyn alǵa tartqan. Odan bólek, azyq-túlik jetkizetin fırmany, ony paıdalaný úshin qymbat sheteldik mashınany alatynyn aıtqan. Osylaısha, onyń tolyqtaı senimine kirip, 115 mln teńgege jýyq aqshasyn alǵan», — dep habarlady ShQO polıtsııa departamentiniń baspasóz qyzmetinen.
Tártip saqshylary alaıaqtyq faktisi boıynsha qylmystyq is qozǵap, kúdiktini ustady.
«Ol buryn sottalǵan jáne qazir osyǵan uqsas qylmys jasaǵany úshin jazasyn ótep jatqan 39 jastaǵy Óskemen qalasynyń turǵyny bolyp shyqty. Polıtseıler tergeý amaldaryn jalǵastyrýda», — delingen aqparatta.
