Óskemen turǵyny jylyjaıda qarasora ósirip kelgen
ÓSKEMEN. KAZINFORM – Óskemende polıtsııa jylyjaıda esirtki ósirgen turǵyndy ustady, dep habarlaıdy Polisia.kz.
Óskemen qalasynda ShQO PD esirtki qylmysyna qarsy kúres basqarmasynyń qyzmetkerleri «Qarasora-2026» jedel-profılaktıkalyq is-sharasy barysynda esirtki ósimdikterin zańsyz ósirý faktisin anyqtady.
Oblys ortalyǵynyń 45 jastaǵy turǵynynyń turǵylyqty jerin tekserý barysynda polıtseıler jasyl tústi 6 túp ósimdik egilgen jylyjaıdy anyqtady. Sondaı-aq monshadan quramynda ósimdik tekti zat bar eki qaǵaz býma tárkilendi.
Saraptama qorytyndysyna sáıkes, tárkilengen ósimdikterdiń «Qarasora» tegi ekeni belgili boldy jáne esirtki quralyna jatady. Keptirilmegen ósimdikterdiń jalpy salmaǵy 1085 gramdy qurady. Sonymen qatar 2,65 gramm keptirilgen marıhýana men quramynda temeki qospasy bar marıhýananyń bar ekendigi anyqtaldy.
Belgili bolǵandaı, er adam qarasora tuqymdaryn ınternet arqyly tapsyrys berip, poshta arqyly alǵan. Onyń aıtýynsha, bul ósimdikterdi tek jeke maqsatta paıdalaný úshin ósirgen. Atalǵan fakti boıynsha sotqa deıingi tergeý amaldary júrgizilip jatyr, kúdiktige qatysty kelý týraly mindetteme túrindegi bultartpaý sharasy tańdaldy.
– Polıtsııa esirtki ósimdikterin zańsyz ósirý jáne esirtki zattaryn saqtaý qylmystyq jaýapkershilikke ákep soǵatynyn eske salady. Polıtsııa óńirdegi esirtki qylmystaryn anyqtaý jáne olardyń jolyn kesý jumystaryn jalǵastyryp jatyr, – delingen polıtsııa habarlamasynda.
Aıta keteıik, Almatyda esirtki saýdasyna daıyndalǵan 130 orama tárkilengenin jazdyq.
Sondaı-aq Jambyl oblysynda 376 tonna jabaıy qarasora joıyldy.
