Óskemen turǵyny ózin WhatsApp-ta qorlaǵan tanysyn sotqa berdi

Óskemen qalasynyń turǵynyn WhatsApp jelisinde qorlaǵan adamǵa 5 myń teńge mólsherinde aıyppul salyndy, dep habarlaıdy Kazinform.

Óskemen qalalyq soty baspasóz qyzmetiniń málimetine súıensek, áıel adam WhatsApp jelisindegi topta ózin tanysynyń qorlaǵanyn aıtyp, sotqa shaǵym túsirgen. 

Belgili bolǵandaı, oǵan: «Sen, urlyqshy, aýzyńdy jap. Ómir boıy urlap kelesiń, endi birdeńe degiń kele me?» degen habarlama jibergen. Bul habarlamany toptyń 93 múshesi oqyǵan. 

«Sot isti qarady. Talapker sýdıadan jaýapkerdi ar-namysy men qadir-qasıetine nuqsan keltiretin aqparatty teriske shyǵarýǵa mindetteýdi surady. Sot onyń bul talabyn qanaǵattandyrdy. Sondaı-aq jaýapkerge 5 myń teńge mólsherinde aıyppul salyndy», - delingen aqparatta.