Óskemen turǵyny kóligine qulaǵan aǵash úshin kommýnaldyq mekemeden 2,5 mln teńge óndirip aldy

ÓSKEMEN. KAZINFORM – Óskemen qalalyq sotynda kólikke qulaǵan aǵashtyń saldarynan kelgen materıaldyq shyǵyndy óteý týraly azamattyq is qaraldy.

2025 jylǵy 4 sáýirde qaladaǵy kóshelerdiń birinde turaqta turǵan kóliktiń ústine aǵash qulaǵan. Sonyń saldarynan kólikke aıtarlyqtaı zaqym keltirilgen. Mamandardyń qorytyndysy boıynsha, kólikti jóndeý ekonomıkalyq turǵyda tıimsiz dep tanyldy. Al sarapshy kóliktiń naryqtaǵy quny 2,5 mln teńge mólsherinde dep baǵalaǵan.

Belgili bolǵandaı, aǵash jergilikti kommýnaldyq kásiporynnyń qaraýyndaǵy jol jıeginde turǵan. Bul kásiporyn men Óskemen qalalyq TÚKSh bólimi arasynda kósheler men joldardy kútip-ustaý týraly kelisimshart bar. Sol qujatta aınalaǵa qaýip tóndiretin aǵashtardy anyqtap, joıý mindeti de qarastyrylǵan.

- Sot barysynda kommýnaldyq kásiporyn jaýapker retinde tanyldy. Sebebi ol ózine senip tapsyrylǵan aýmaqta qaýipsizdikti qamtamasyz etý mindetin der kezinde oryndamaǵan. Sot talapkerdiń aryzyn ishinara qanaǵattandyrdy. Kommýnaldyq kásiporynnan kólik ıesine keltirilgen materıaldyq zalal retinde 2 418 250 teńge jáne ókil, sarapshy men notarıýs qyzmetterine ketken shyǵyndardy óteý úshin 248 508 teńge óndirip alyndy, - dep habarlady sottyń baspasóz qyzmetinen.

Eske salsaq, osyǵan deıin burynǵy áıelin emhanada óltirgen atyraýlyq 15 jylǵa sottalǵany habarlanǵan.