Óskemen turǵyndarynyń jolǵa tuz sebýge qarsy talap aryzyn sot qanaǵattandyrmady

ÓSKEMEN. KAZINFORM – Óskemen qalalyq soty «Taza Óskemen» kásipornynyń jolǵa tuz sebýine qatysty talap aryzdy qanaǵattandyrmady.

Osyndaı talap aryz bergen turǵyndar tuzdyń qorshaǵan ortaǵa zııanyn tıgizip, jazataıym oqıǵalardy kóbeıtetinin alǵa tartty. Alaıda sot buǵan kelispedi.

— Aryz berýshiler jolǵa 23% tehnıkalyq tuz jáne 77% sýdan turatyn eritindiniń sebiletinin, qar erigen kezde reagentter Ertiske quıylyp, ózendi lastaıtynyn jetkizdi. Sondaı-aq olar bul qospa joldardy taıǵaq etip, kólikterdiń júrýin qıyndatatynyn málimdedi. Al «Taza Óskemen» kásipornynyń ókilderi sot barysynda qospanyń qorshaǵan ortaǵa jáne halyqtyń densaýlyǵyna zııan keltirgeni týraly eshqandaı dálel joqtyǵyn aıtty. Sot taraptardyń ýájderin tyńdaı kele, sý-tuz eritindisine tyıym salýǵa negizderdiń jetkiliksizdigi týraly qorytyndyǵa keldi, - delingen aqparatta. 

Úkim áli zańdy kúshine engen joq. Sondyqtan taraptardyń bul sheshimge apellıatsııalyq shaǵym túsirýge qaqy bar. 

Eske salsaq, buǵan deıin Pavlodar — Semeı avtojolynda kólik apatynan júrgizýshi qaza bolǵany habarlanǵan.