Óskemen turǵyndary men polıtseılerden aqsha bopsalaǵan bloger 4 jylǵa túrmege qamaldy

ÓSKEMEN. KAZINFORM – Óskemen qalasynyń turǵyndary men polıtseılerdiń abyroıyna nuqsan keltiretin vıdeony áleýmettik jelige jarııalaımyn dep qorqytyp, aqsha talap etken bloger sottaldy.

ShQO soty baspasóz qyzmetiniń málimetinshe, K. esimdi azamat 2021 jyldyń shildesinen 2024 jyldyń mamyryna deıingi aralyqta 6 jábirlenýshiden aqsha bopsalaǵan. 

- Bloger áıeli men kúıeýiniń otbasylyq janjaly túsirilgen vıdeony áleýmettik jelige jarııalaıdy. Sol vıdeony óshirý úshin erli-zaıyptydan 21 000 teńge talap etken. Aqsha qolyna tıgennen keıin vıdeony óshirgen, - delingen aqparatta. 

Taǵy bir azamattyń kólik júrgizýge quqyǵy joq ekenin bilgen aıyptalýshy ony vıdeoǵa túsirip, jelige júkteıtinin, polıtsııa shaqyratynyn aıtyp qorqytqan. Osylaısha, er adamnan 140 000 teńge bopsalap alǵan.

- 2024 jylǵy sáýirde K. óziniń Instagram jelisindegi paraqshasynda mektepterge generatorlardy qymbat baǵamen jetkizgen adam jaıly vıdeo jarııalap, bul fakti boıynsha quqyq qorǵaý organdaryn tekserý júrgizýge shaqyrǵan. Sodan keıin bul jazbany óshirý úshin ol azamattan 700 000 teńge talap etken, - delingen habarlamada. 

Sondaı-aq bloger jol erejesin buzǵan óziniń burynǵy áıeline hattama toltyrǵan polıtsııa qyzmetkerlerin ańdýǵa kóshken. Vıdeoǵa túsirip, áleýmettik jelide jarııalap, olardan burynǵy jubaıynyń aıyppulyn tóleýdi, oǵan gúl syılap, keshirim suraýdy talap etti. Polıtseıler bul talaptardy túgeldeı oryndaýǵa májbúr bolǵan.

Óskemen qalalyq №2 sotynda ótken sot otyrysynda K. óz kinásin moıyndamady. Sot aıyptalýshyny kináli dep tanyp, 4 jyl bas bostandyǵynan aıyrý jazasyn taǵaıyndady.

Sonymen qatar ol úsh jábirlenýshige jalpy somasy 500 000 teńge kóleminde moraldyq zalaldy óteýge mindetteldi. Úkim áli zańdy kúshine engen joq.

Eske salsaq, osyǵan deıin ózin blogermin dep tanystyrǵan aqtóbelik sottalǵany habarlanǵan.