Óskemen turǵyndary endi smartfonnan aýanyń sapasyn baqylaı alady
ASTANA. KAZINFORM — Óskemen turǵyndary óńirlik ekologııalyq monıtorıng jelisiniń kórsetkishterin táýlik boıy onlaın rejımde kóre alady, dep habarlaıdy Kazinform tilshisi.
«Qazgıdromet» RMK-nyń Airkz resmı mobıldi qosymshasyna 25 avtomatty ekologııalyq bekettiń derekteri engizildi.
Quny shamamen 500 mln teńge bolatyn aýqymdy ólsheý jelisin Shyǵys Qazaqstan oblysynyń ákimdigi 2025 jyly satyp alyp, Tsıfrlandyrý jáne arhıvter basqarmasynyń balansyna bergen. Alaıda osy ýaqytqa deıin datchıkterdiń kórsetkishteri tek mekemelerdiń ishki aqparatynda ǵana bolǵan.
Derekterdi kópshilikke onlaın qoljetimdi etý úshin birneshe aı boıy tehnıkalyq kalıbrleý jumystary júrgizilip, IT mamandary, sınoptıkter, ónerkásip kásiporyndarynyń ekologteri jáne «Óskemen tynysy» qoǵamdyq bıýrosynyń ókilderi birlesip jumys istedi.
Aqparatty ashyq jarııalaýdaǵy basty kedergi ólsheý quraldarynyń metrologııalyq tekserýden ótýi boldy. Ulttyq gıdrometeorologııalyq operatordyń resmı qosymshasy durys rettelmegen nemese tekserýden ótpegen qurylǵylardyń derekterin qabyldamaıdy.
— Resmı qosymshaǵa derekterdi engizý úshin memlekettik úlgidegi ólsheý quraldaryna qoıylatyn barlyq talap qatań saqtalýy kerek. 25 bekettiń barlyǵy mindetti tekserýden ótip, ólsheý dáldigin rastady. Qazir alynǵan málimetterdi esepteý ádistemelerinde tolyq paıdalaný máselesi pysyqtalyp jatyr. Aldaǵy ýaqytta bul kórsetkishterdi fılıaldyń ózine tıesili toǵyz statsıonarlyq bekettiń derekterimen qatar, aýa basseıniniń jaı-kúıin keshendi baǵalaý kezinde eskerýdi josparlap otyrmyz, — dedi «Qazgıdromet» RMK ShQO fılıalynyń basshysy Lázzat Bolathan.
Jańa beketter oblys ortalyǵynyń barlyq derlik aýdanyna ornatylǵan. Avtomatty qurylǵylar aýadaǵy shań bólshekterin úzdiksiz taldap, ónerkásiptik bes negizgi gazdyń kontsentratsııasyn ólsheıdi. Olar:
- kómirtek totyǵy (CO);
- azot dıoksıdi (NO₂);
- ozon (O₃);
- kúkirtsýtek (H₂S);
- kúkirt dıoksıdi (SO₂).
Tútin men qolaısyz meteorologııalyq jaǵdaı máselesi jyldar boıy ózekti bolyp kele jatqan ónerkásiptik Óskemende baqylaý beketteriniń sany 9-dan 34-ke deıin artty.
Endi qala turǵyndary táýliktik esepti kútpeı-aq, smartfon arqyly óz shaǵynaýdanyndaǵy aýanyń lastaný deńgeıin ózderi baqylaı alady.
Buǵan deıin Astana men Almatyda jáne elimizdiń ortalyǵyndaǵy qalalarda aýa sapasy nasharlaıtynyn jazǵanbyz.
