Óskemen turǵyndary áli de aýanyń lastyǵyna shaǵymdanyp jatyr
ÓSKEMEN. KAZINFORM — Óskemendegi Tıtan magnıı kombınaty ornalasqan Sogra yqsham aýdany turǵyndarynyń aýanyń lastyǵyna shaǵymdanyp jatqanyna búgin úshinshi kún. Jergilikti turǵyndar hımııalyq ıiske, jıi jóteletindikterine jáne tynys alýdyń qıyndaǵanyna shaǵymdandy. Kýágerlerdiń aıtýynsha, keshe túnde jáne búgin tańerteń qoıý tumannan 20 metrden ary esh nárse kórinbeıdi.
— Tańerteń oıansam tamaǵym qysyp tur. Kóshege shyqsam — aınalany tútin basqan. Jedel qyzmetterge qońyraý shalsam — bári durys dep jaýap berdi. Biraq qalaı bári durys bolady?, — dep jazdy áleýmettik jelige qala halqynyń biri.
19 mamyrdan beri Óskemende 2-dárejeli qolaısyz meteorologııalyq jaǵdaı jarııalanǵan. Sol ýaqyttan Sogra yqsham aýdanyndaǵy mektepter qashyqtan oqý formatyna aýystyrylǵan.
ShQO Ekologııa departamentiniń málimetine súıensek, mamandar jaǵdaıdy baqylaýdy jalǵastyryp jatyr. Qosymsha zerthanalyq zertteýlerdiń nátıjeleri áli jarııa etilmedi.
Eske salsaq, osyǵan deıin Óskemende jelide taraǵan vıdeodan soń ekologtar tekserý júrgizgeni habarlanǵan.
Aýaǵa taraıtyn zııandy qaldyqtardyń ruqsat etilgen shekten asýy tirkelmegenimen, kásiporynda shynymen de shtattan tys jaǵdaı bolǵany anyqtaldy.