Óskemen tramvaı parkiniń múlki satylymǵa shyǵaryldy
ÓSKEMEN. QazAqparat - Qaryzy bastan asyp, jumysy toqtatylǵan Óskemen tramvaı parkiniń múlki satylymǵa qoıyldy, dep habarlaıdy QazAqparat tilshisi.
Satylymǵa qoıylǵan múliktiń ishinde jyljymaly quram men relster, qosalqy stansalar men park ǵımaraty, jer telimi bar. Barlyq múliktiń jıyntyq baǵasy 853 mln teńgege baǵalanýda.
Sot oryndaýshylardyń aıtýynsha, bul týraly aqparat www.eauc.kz. saıtyndaǵy biryńǵaı elektrondy saýda alańynda jarııalanǵan. Aýktsıon 20 naýryzǵa josparlanyp otyr.
«Óskemen tramvaı parki» JShS-ne tıesili múlikterdiń satylymǵa qoıylǵany ras. Aýktsıon ótip, nátıjesi belgili bolǵanǵa deıin múlik ıesi ózim bolyp qala beremin, - deıdi seriktestik dırektory Anatolıı Ýspenskıı.
Aıta keteıik, buǵan deıin Semeı qalasynyń áýejaı múlikteri aýktsıonda satylyp, keıin onyń nátıjeleri zańsyz dep tanylǵan bolatyn.
Foto: yk-news.kz
