Óskemen sý elektr stantsııasy jekeshelendirile me

ÓSKEMEN. KAZINFORM — Keıbir nysandardy memlekettik sektordan shyǵarý usynylǵan tizim jarııalanǵannan keıin Óskemen sý elektr stantsııasyna qatysty birqatar suraq týyndady. 

Ulttyq jekeshelendirý keńsesiniń platformasynda jarııalanǵan tizimde «Óskemen SES» AQ kórsetilgen. Bul jaıt turǵyndar men energetıka salasynyń ókilderi arasynda túsinispeýshilik týdyrdy.

Kompanııanyń baspasóz qyzmetiniń málimetinshe, tizimde kórsetilgen nysannyń SES-ke qatysy joq.

— Tizimdegi aktsıonerlik qoǵam — bólek derbes qurylym. Ol Óskemen SES-iniń jumysymen baılanysty emes jáne onyń qyzmetine esh áser etpeıdi, — delingen aqparatta.

Óńirdi elektr energııasymen qamtamasyz etip otyrǵan qoldanystaǵy sý elektr stantsııasy múlde basqa uıymnyń basqarýynda.

— Barlyq óndiristik nysannyń jumysyn «Samuryq-Energo» holdıngine kiretin «AES Óskemen SES» JShS júzege asyrady. Stantsııa qalypty rejımde jumys istep tur jáne kúzgi-qysqy kezeńge tolyq daıyn, — dep habarlady kompanııadan.

Eske salsaq, osyǵan deıin Aıagózde áleýmettik úılerdi jekeshelendirý máselesin sheshý úshin jumys toby qurylǵany habarlanǵan.