Óskemen shetindegi 8 úıdi sý aldy
ÓSKEMEN. QazAqparat - Óskemenge Úlbi ózeninde sý deńgeıiniń kóterilýi saldarynan qala mańyndaǵy Sogra kentindegi damba arqyly sý aǵyp kele bastady, dep habarlady qalalyq TJD-ǵa silteme jasap «QazAqparat» HAA tilshisi.
Sý Gorodskaıa, Tselınogradskaıa, Depýtatov kóshelerindegi úılerdi jáne «Kommýnalnık» baý-baqsha qoǵamy aýmaǵyn basa bastady. Jekemenshik segiz úı men 3 saıajaı aýlasyn, mańyndaǵy baqshany sý basty. «Óskemen tártip» kásipornynyń 20 adamy men 20 tehnıkasy topyraq seýip, sý kelip jatqan joldy 50 toltyrylǵan qappen bitedi. Qosymsha 136 tonna ınertti materıal ázirlendi.
Sý tasqynymen Óskemen TJB mamandary, merdigerlik uıymdar, qalalyq ákimdik mamandary kúresýde. Qalalyq jáne oblystyq TJ qyzmetkerleri dambany bekitip, sý aǵyzdy. Oqıǵa ornynda qutqarýshylar jáne jergilikti polıtsııalardan quralǵan táýlik boıy kezekshilik uıymdastyryldy.
ShQO TJD №5 órt bóliminiń qutqarýshylary arnaıy kólikpen 3 adam men bir balany evakýatsııalady. Táýlik ishinde 200 tekshe metr sý aıdaldy. Oqıǵa ornynda arnaıy tehnıka jumysyn jalǵastyrýda. Jaǵdaı baqylaýda, dedi ShQO TJD.
