«Óskemen-Semeı» tasjolynda avtokólik órtenip ketti
NUR-SULTAN. QazAqparat - «Óskemen-Semeı» avtojolynda «Skanııa» markaly avtokólik órtenip ketti, dep habarlaıdy ShQO TJD baspasóz qyzmeti.
«09 aqpan kúni saǵat 21:00 shamasynda Ulan aýdanyndaǵy Tavrııa aýylynan 20 shaqyrym jerdegi «Óskemen-Semeı» avtojolynda «Skanııa» markaly avtokólik órtengen. 38-ÓSB qutqarýshylary kelgen sátte atsetılen ballondaryn tasymaldaıtyn avtokólik jalynǵa oranǵan bolatyn. Qaýipsizdik maqsatynda Jol polıtsııasy qyzmetkerleri avtojoldaǵy qozǵalysty ýaqytsha toqtatty. Oqıǵa ornyna Apattar medıtsınasy ortalyǵynyń trassalyq medıtsınalyq - qutqarý pýnktinen dárigerleri bardy. Zardap shekkender boıynsha aqparat túsken joq. Kólik júrgizýshisi de aman» delingen habarlamada.
Málimetke saı, ballondardyń jarylýyna baılanysty órtti dereý sóndirý múmkin bolmady. TJD órt sóndirýshileri aldymen qaýipsizdik tehnıkasyn saqtaı otyryp qashyqtyqta boldy.
Jarylystar toqtaǵan soń órt sóndirýshiler ballondy sýytý men órtti sóndirý úshin sý quıdy. Órt 22 saǵat 35 mınýtta aýyzdyqtaldy.
Órtti sóndirýge ShQO TJD Órt sóndirý qyzmeti jeke quramnyń 6 adamy, 2 tehnıkasy jumyldyryldy.
