Óskemen — Semeı tasjolynda qaraýsyz mal kesirinen 14 jol apaty boldy

ÓSKEMEN. KAZINFORM — Óskemen — Semeı tasjolynda qaraýsyz mal kesirinen bir jylda 14 jol apaty tirkeldi.

Oblystyq polıtsııa departamenti baspasóz qyzmetiniń málimetine súıensek, jolǵa shyǵyp ketken tórt túliktiń saldarynan 14 ret jol apaty bolyp, onyń ekeýi adam ólimimen aıaqtaldy.

Osyndaı qaıǵyly oqıǵalardyń aldyn alý maqsatynda Jańasemeı aýdanynyń polıtsııa qyzmetkerleri qoǵam belsendilerimen, ınspektsııa jáne veterınarııa qyzmetkerlerimen birlesip, maldy qaraýsyz jiberetinderdi anyqtaý úshin reıd ótkizdi. 

— Sonyń barysynda 40 bas jylqy aıyp turaǵyna qoıylyp, sharýa qojalyǵynyń ıesi ákimshilik jaýapkershilikke tartyldy. Budan basqa da birqatar buzýshylyq anyqtaldy. Atap aıtqanda, jylqylardyń chıptelmeýi jáne tańbalanbaýy, qyzmetkerlermen eńbek sharttarynyń jasalmaýy. Barlyq fakti qujattalyp, protsessýaldyq sheshim qabyldaý úshin sotqa joldandy, — delingen aqparatta.

Osy rette, tártip saqshylary kásipkerlerge mal jaıý erejelerin qatań saqtaýǵa shaqyrdy. 

Eske salsaq, osyǵan deıin ShQO-da er adam ózi jumys istegen qojalyqtyń 20-ǵa jýyq jylqysyn urlaǵany habarlanǵan.