«Óskemen-Samar» tasjolynda júk kóligi aýdarylyp, zeınetker kóz jumdy
ÓSKEMEN. QazAqparat – Shyǵys Qazaqstan oblysyndaǵy «Óskemen-Samar» tasjolynda aýyr júk kóligi aýdarylyp, 72 jastaǵy jolaýshy mert boldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 23 tamyzda saǵat 14.50 shamasynda bolǵan. Ulan aýdanynyń mańyndaǵy «Óskemen-Samar» tasjolynyń 69 shaqyrymynda órden túsip kele jatqan «HOWO» markaly júk kóligi kenet tejegishi isten shyǵyp, aýdarylyp tústi.
Jol apaty saldarynan 72 jastaǵy zeınetker oqıǵa ornynda kóz jumdy. Al 32 jastaǵy taǵy bir jolaýshy dene jaraqatyn alǵan. Qazirgi ýaqytta ol aýrýhanaǵa jetkizildi», - delingen aqparatta.
Tártip saqshylary atalǵan fakti boıynsha QR Qylmystyq kodeksiniń 345-baby 3-bóligine (abaısyzda adam ólimine ákep soqqan jol qozǵalysy erejelerin buzý) sáıkes sotqa deıingi tergeý amaldaryn bastaldy.
