«Óskemen-Rıdder» tasjolynda qys sońyna deıin kólik qozǵalysy shekteledi

ÓSKEMEN. QazAqparat – Shyǵys Qazaqstan oblysyndaǵy «Óskemen-Rıdder» tasjolynda qys sońyna deıin kólik qozǵalysy shekteledi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńirdegi tasjoldardyń birinde kólik qozǵalysy shekteledi.

«24 qarashadan bastap kún saıyn saǵat 21.00 men 06.00 aralyǵynda «Óskemen - Rıdder» tasjolynyń 94-den 104 shaqyrymǵa deıingi ýchaskesinde tirkemesi jáne jartylaı tirkemesi bar kólikterdiń qozǵalysyna tyıym salynady. Shekteý qys mezgiliniń sońyna deıin saqtalady», - delingen aqparatta.

Osy rette departament mamandary oblys turǵyndaryna qolaısyz aýa raıynda alys saparǵa shyqpaýǵa, joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.