Óskemen-Rıdder tasjolynda asfalttyń opyrylǵany jaıly aqparat – jalǵan
ÓSKEMEN. KAZINFORM — Shyǵys Qazaqstan oblysyndaǵy Óskemen-Rıdder tasjolynda asfalttyń opyrylǵany jaıly jalǵan aqparat tarap jatyr.
«QazAvtoJol» UK ShQO fılıalynyń málimetinshe, respýblıkalyq mańyzy bar Óskemen-Rıdder, Óskemen-Shemonaıha, Óskemen-Altaı-Rahman qaınarlary jáne Óskemen-Semeı baǵyttaryndaǵy joldarda ortasha jóndeý jumystary qolǵa alynǵan.
Bul jobalarda jer tóseminiń ıirimin (pýchınalardy) joıý sharalary da qarastyrylǵan. Al bul jumystardy vıdeoǵa túsirip alǵandar jelide Óskemen-Rıdder tasjolynda asfalttyń opyrylǵany jaıly jalǵan aqparat taratqan.
— Jer tóseminiń ıirimi — bul joldyń ústińgi qabatynyń, ıaǵnı asfalttyń emes, jol negiziniń buzylýy. Bul máseleni sheshý úshin merdigerler joldyń buzylyp ketken negizin qaıta tóseıdi. Ol úshin jerdi 1,5 metr tereńdikke deıin qazyp, bul ýchaskelerdi tasty topyraqpen nyǵaıtady. Dál osylaı jýyrda Óskemen-Altaı-Rahman qaınarlary baǵytyndaǵy jol qalpyna keltirildi. Sondyqtan bul josparly jumys, — dedi fılıal dırektory Nurbek Temirhanov.
Eske salsaq, osyǵan deıin Shyǵys Qazaqstanda joldy sý shaıyp ketkeni jaıly jazǵanbyz.