Óskemen irgesindegi shaǵyn aýdan halqy jaryq joqtyǵyna shaǵymdandy
ÓSKEMEN. KAZINFORM – Óskemen qalasynyń irgesindegi áýejaı mańynda turatyn halyq kósheniń jaryqtandyrylmaı turǵanyn aıtyp shaǵymdandy. Sonyń saldarynan balalar mektepten qaıtqanda qorqady.
Praporşıkovo shaǵyn aýdanynyń jurtshylyǵy avtobýsqa otyrý úshin únemi áýejaı mańyndaǵy aıaldamaǵa baratynyn jetkizdi. Olardyń aıtýynsha, keshke eresekter jumystan, al balalar mektepten qaıtqanda aıaldamadan úıge jetetin jolda jaryq óte nashar.
- Sonyń saldarynan balalar qorqady. Odan keıin qalaǵa kireberistegi «Óskemen» dep jazylǵan sáýlettik qurylym úshinshi jyl qatarynan janbaı tur, ári aınalasyn qoqys basyp ketken. Bul másele naqty qashan sheshiletinin bilgimiz keledi, - deıdi turǵyndar.
Belgili bolǵandaı, arhıtektýralyq «Óskemen» jazýy bar qurylym 2020 jyly ornatylǵan. Qala ákimdiginiń málimetinshe, tekserý barysynda jazýdyń astarlyq jaryqtandyrý jelileriniń úzilgendigi anyqtaldy.
- Kóshe jaryǵyn kútip-ustaý boıynsha merdigerlik uıym jaryqtandyrýdy qalpyna keltirý maqsatynda jelilerdi aýystyrý jumystaryn júrgizetin bolady. Kósheler men joldardy kútip-ustaýǵa jaýapty merdiger uıym – «Taza Óskemen» sharýashylyq júrgizý quqyǵyndaǵy memlekettik kommýnaldyq kásiporny. Sanıtarlyq tazalaý jumystary bekitilgen kestege sáıkes júrgiziledi, - delingen aqparatta.
Ákimdiktiń málimetinshe, áýejaı aýmaǵynan shyqqannan keıingi ashyq tıptegi aıaldama eki kóshe jaryǵy baǵanasynyń arasyndaǵy aralyqta ornalasqan. Atalǵan baǵandar shtattyq rejımde jumys istep tur.
- Bıyl Óskemen qalasy aýmaǵynda 1147 kóshe jaryǵy baǵany ornatylyp, 17 bilim berý nysanyna baratyn joldar jaryqtandyryldy. Bul baǵyttaǵy jumystar kelesi jyly da jalǵasyn tabady, - delingen habarlamada.
Maqala jaryq kórmes buryn Kazinform tilshisi áýejaı mańyna baryp kórdi. «Óskemen» jazýy bar qurylym qazir janyp tur eken.
Eske salsaq, osyǵan deıin Almatynyń Alataý aýdanynda jaryqtyń óshýine sebep bolǵan kompanııaǵa aıyppul salynatyny habarlanǵan.