Óskemen polıtseıleri joǵalǵan balany bes mınýt ishinde tapty
ÓSKEMEN. QazAqparat – Óskemen qalasynyń tártip saqshylary 4 jasar balany beınekameralar arqyly taýyp, anasyna qaıtardy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetinshe, 102 kanalyna áıel adam qońyraý shalǵan. Ol balabaqshadan shyqqan kezde tórt jasar balasyn joǵaltyp alǵanyn, balanyń arqasynda qyzyl sómkesi bar ekenin túsindirdi.
«Jedel basqarý ortalyǵynyń kezekshisi joǵalǵan balanyń kelbeti, kıgen kıimi men ózge de erekshelikterine baılanysty málimetterdi ishki kanaldar arqyly polıtsııa qyzmetkerlerine jiberdi. Birneshe mınýt ishinde izdeý jumystary sátti aıaqtaldy. Polıtseıler beınebaqylaý kameralaryn muqııat tekserip, Qazaqstan - Myzy kósheleriniń qıylysynda joǵalǵan búldirshindi taýyp aldy», - dep habarlady vedomstvo ókilderi.
