Óskemen polıtseıleri órtengen úıden eki múgedek áıeldi qutqardy
ÓSKEMEN. QazAqparat – Óskemen qalasynyń tártip saqshylary otqa oranǵan úıden eki múmkindigi shekteýli áıeldi qutqardy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 9 qazan kúni tańerteń «102» kanalyna jeke sektorlardyń birindegi úıdiń órtenip jatqany týraly habar túsken. Sol jerge birden «Qyran-36» patrýldik polıtsııa ekıpajy attanǵan.
«Oqıǵa ornyna kelgen polıtsııa qyzmetkerleri qoıý qara tútindi baıqaıdy. Úı ishinen áıeldiń aıqaılaǵan daýysyn estigen PPB aǵa ınspektory, polıtsııa aǵa leıtenanty Qanat Qasymhanov pen PPB ınspektory, polıtsııa aǵa leıtenanty Mırhat Gınaıatov ekige bólinip, sol jaqqa qaraı umtylǵan», - dep habarlady vedomstvo ókilderi.
Tártip saqshylarynyń biri terezeni syndyryp, áıeldi syrtqa shyǵardy. Ol 1-toptaǵy múgedek bolyp shyqty.
Jábirlenýshi úıde taǵy bir apaıynyń bar ekenin, ol da múmkindigi shekteýli jan ekenin aıtty. Polıtsııa qyzmetkerleri esh oılanbastan ony da izdeýge kóshken.
«Úı ishin tumshalaǵan tútinnen ekinshi adamdy tabý qıynǵa soqty. Osy ýaqytta Tótenshe jaǵdaılar departamentiniń qyzmetkerleri kelip jetip, áıel adamdy qutqardy. Iis tıgen ol aýrýhanaǵa jetkizildi» delingen ShQO PD málimetinde.
