Óskemen polıtseıleri alaıaqtyqtyń aldyn alý úshin jańa ádis oılap tapty
ÓSKEMEN. QazAqparat – Óskemen qalasynyń polıtseıleri adam kóp júretin qoǵamdyq orynda alaıaqtar týraly eskertý trafaretterin jasady, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, tártip saqshylary alaıaqtyqtyń, onyń ishinde ásirese ınternet-alaıaqtyqtyń jolyn kesý maqsatynda túrli profılaktıkalyq sharalar júrgizip jatyr.
«Jerge jazylǵan osyndaı eskertýlerdi jol qıylystarynda, jaıaý júrginshiler ótkelderiniń aldynda, bankterdiń mańynda jáne basqa da qoǵamdyq oryndardan kórýge bolady. Sondaı-aq adam kóp jınalatyn oryndarda alaıaqtardan abaı bolý qajettigi týraly jadynamalar ornalastyryldy», - delingen aqparatta.
- Áleýmettik jelidegi kúmándi usynystardan bas tartyńyz;
- Taýardy satyp alý (satý) kezinde aldyn ala tólem jasaýǵa esh ýaqytta kelispeńiz;
- Tanymaıtyn adamdarǵa aqsha aýdarmańyz;
- Úshinshi tulǵalarǵa bank kartalarynyń nómirlerin, pın-kodtardy, uıaly telefonǵa kelip túsken kilt sózderdi jibermeńiz.
