Óskemen perzenthanasyn úki kúzetip júr
ASTANA. KAZINFORM – Óskemendegi Ana men bala ortalyǵy aýmaǵynda erekshe qonaq baıqaldy. Perzenthana terezeleriniń janyndaǵy aǵashqa sur úki kelip qonǵan.
Qusty alǵash aýrýhananyń kezekshi qyzmetkerleri baıqaǵan.
- Áýelde elestegen bolar dep oıladyq, keıin qarasaq úki shynynda da qonaqtap, terezege qarap tynysh baqylap otyr, múlde qoryqpaıdy, - deıdi medbıkelerdiń biri.
Perzenthana qyzmetkerleri úkiniń sýretin áleýmettik jelidegi paraqshalarynda jarııalaǵan, al kadr tez arada kóptiń nazaryn aýdaryp, taraı bastady.
Kópshilik ázildep, úki turymtaıdyń (aıst) ornyna kelgen shyǵar, qýanyshty jańalyqty jetkizýshi qyzmetin ýaqytsha óz moınyna aldy dep jazyp jatyr. Basqalary bolsa qaljyńdap, bálkim, Ana men bala ortalyǵynda Garrı Potter dúnıege kelgen bolar deıdi.
Mamandardyń aıtýynsha, atalǵan qustyń óńirde paıda bolýy sırek jaǵdaı.
- Úkiler ádette ný orman men adamnan alys aýmaqtardy mekendeıdi. Qalada olar óte sırek kezdesedi, kóbine soltústik nemese Oral aımaqtarynda ushyrasady, - deıdi ornıtologtar.
Boljam boıynsha, qus baǵytynan adasyp ketken bolýy múmkin nemese jyly ári tynysh jer izdegen. Al perzenthana mańy qolaıly aıaldama bolyp shyqqan bolýy múmkin. Munda eski aǵashtar bar ári salystyrmaly túrde tynysh.
Sýyq túsken saıyn kóptegen qus azyq pen pana izdep, adam qonystaryna jaqyndaı túsedi. Sondyqtan ornıtologtar qanatty qonaqty mazalamaýǵa jáne múmkindiginshe kómek kórsetýge shaqyrady.
- Saıabaqqa jem salǵysh ilip qoıyńyzdar nemese bir buryshqa azdap dán qaldyryńyzdar. Bul qustarǵa aıazdy kúnderdi jeńil ótkizýge kómektesedi, - dep tolyqtyrdy mamandar.
Aıta keteıik, Óskemende mobıldi baılanys pen ınternet durys ustamaıtyn segiz aýmaq bar.