«Óskemen - Pavlodar» baǵytynda jolda qalǵan oqýshylar kolledjge ornalastyryldy
ASTANA. QazAqparat - «Óskemen - Pavlodar» baǵytynda jolǵa shyqqan hokkeıshi oqýshylarǵa toly avtobýs dittegen jerine jete almaı qalǵan, dep habarlaıdy «QazAqparat» HAA tilshisi.
«Qatty jaýǵan jańbyr jáne kóktaıǵaqtyń saldarynan Almaty - Ekaterınbýrg tas jolynda Spassk kentiniń aýmaǵynda joldyń bıik jerinde keptelis týyndady. Kóbinese júk kólikteri kepteliste qalyp qalǵan. Oqıǵa ornynda áriptesterimiz - Qazavtojol, polıtsııa jáne TJB qutqarý jasaqtarynyń ókilderi jumys jasaýda», - dedi QR ІІM Tótenshe jaǵdaılar komıtetiniń resmı ókili Rýslan Imanqulov Astanada ótken baspasóz máslıhaty barysynda.
Onyń aıtýynsha, sonymen qatar, Pavlodar oblysynda kepteliste birneshe avtobýs qalǵan.
«Dál qazir ol avtobýstardyń bári jolǵa shyqty. Tek Óskemen - Pavlodar jolynda hokkeı klýbynyń oqýshylary kele jatqan avtobýs jolda qalǵan edi. Oqýshylar qazirgi tańda kolledjge ornalastyryldy. Jaqyn ýaqytta olar da jolǵa shyǵady. Halyqqa aıtarymyz: ásirese aýa raıy buzylǵan kúni jolǵa shyǵýdy keıinge qaldyrǵan durys. Júrgizýshilerdiń qaýipsiz qashyqtyq pen jyldamdyqty ustanǵany abzal. Sondaı-aq, dalada jáne jolda abaı bolǵan jón», - deıdi ol.
Rýslan Imanqulovtyń aıtýyna qaraǵanda, qazirgi tańda halyqaralyq jáne respýblıkalyq mańyzy bar joldarda Tótenshe jaǵdaılar komıtetiniń 40 kúre joldyq medıtsınalyq pýnkteri jabdyqtalǵan. Bul pýnkterde zardap shekken azamattarǵa kómek kórsetiletin bolady.
