Óskemen ortalyǵynda aýqymdy órt shyǵyp, kóshelerdi tútin basty
ÓSKEMEN. KAZINFORM — Óskemen qalasynyń ortalyq kósheleriniń birinde aýqymdy órt shyqty.
Búgin tústen keıin áleýmettik jelide qala kóshelerin tútin basqany jaıly vıdeolar taraı bastady. Belgili bolǵandaı, Abaı dańǵylyndaǵy birqabatty ǵımarattyń shatyry janǵan.
Shyǵys Qazaqstan oblysy Tótenshe jaǵdaılar departamentiniń málimetinshe, sol jerge órt sóndirýshiler jedel kelip jetken.
— Ǵımarat qyzmetkerleri dereý evakýatsııalandy. Abyroı bolǵanda, zardap shekken eshkim joq. Órt sóndirýshilerge qoıý tútin kedergi keltirip, tynys alý múmkin emes jerde jumys isteýge májbúr boldy, — delingen habarlamada.
Oqıǵa ornynda úzdiksiz sý beretin qubyr ornatylǵan. Qazirgi ýaqytta jalyn aýyzdyqtaldy.
Aldyn ala derek boıynsha órttiń jalpy aýdany 600 sharshy metr.
Eske salsaq, osyǵan deıin Atyraýda oıyn-saýyq saıabaǵynan órt shyqqany habarlanǵan.
