Óskemen-Ólgeı áýe qatynasy ashylady
ASTANA. KAZINFORM — Qazaqstan men Mońǵolııa Óskemen-Ólgeı baǵytynda áýe reısin ashýǵa kelisti. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
— Sonymen birge áýe qatynasyn jandandyrý mańyzdy. Qazir Almaty-Ulanbatyr baǵytynda turaqty reıster bar. Kóp uzamaı Astana-Ulanbatyr áýe qatynasy qaıta ashylady. Budan bólek, biz osy sapar aıasyndaǵy kelissózder nátıjesinde Óskemen-Ólgeı baǵyty boıynsha áýe qatynasyn ornatý jóninde naqty kelisimge keldik. Bul mańyzdy sheshimniń arqasynda yntymaqtastyǵymyz odan ary nyǵaıyp, aımaqaralyq baılanystarymyz tyń serpinmen damı túseri sózsiz, — dedi Prezıdent.
Osy oraıda Qasym-Jomart Toqaev Mońǵolııa eliniń basshysy Hýrelsúh myrzaǵa jáne mońǵol tarapynan osy máseleni sheshýge atsalysqan barsha azamatqa alǵys aıtty.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.